作词 : Neidhart von Reuenthal

作曲 : Neidhart von Reuenthal

Ⅰ

Meienzît

âne nît

vröuden gît

wider strît,

sîn widerkomen kan uns allen helfen.

Ûf dem plân

âne wân

siht man stân

wolgetân

liehtiu brûniu blüemel bî den gelfen.

Durch daz gras sint si schôn ûf gedrungen.

Und der walt

manecvalt

ungezalt

ist erschalt,

daz er wart mit dem nie baz gesungen.

Ⅱ

Ich süng nit

nâch ir sit,

hæte ich vrid

des ich bit,

ob mir ieman kœme dran ze trôste

Ich bin verzeit,

mîniu leit

unverjeit

sint sô breit;

ich næme ez noch, swer mich dâ von erlôste.

Liebes blic der kan mich schicken wilde.

Ez ist mîn klage

alle tage,

und gedage

als ein zage.

Liebes blic, lâz mich bî blickes bilde!

Ⅲ

Grôze nôt

Mir enbôt

Der mir drôt

ûf den tôt;

daz ist Hildebolt von Bernriute.

Irenvrit

und der smit

werden glit

an eim wit,

daz si mit gemache lân die liute!

Berewîn den mac nieman überhiuzen.

Amelolt,

Berenbolt

hânt verscholt

daz man solt

über mich gegeben hât ze Priuzen.

Ⅳ

Ich kam dar

âne vâr

und gewahr

zu zir schar;

ich sach waz die getelinge tæten.

Irenber

und ir mêr

gieng entwer

hin und her

mit ir kipfelklingen, sam si mæten.

Dô sprach ich: Nû wolte ich einez wetten,

daz ir gedrœd

und ir gesnœd

würde vrœd

an eîm blœd

nieman künde mit heres kraft enphetten.